На главную страницу 
cделать стартовой   в избранное  



Культурно-просветительская газета татарской общины Республики Мордовия

Мордовия - Информационный портал Республики Мордовия - Морис.ру

Мелькужо Эрзянь Мастор - Форум Страна эрзян, эрзянский форум

Голос Эрзи


КОРТАДО ЭРЗЯКС.

Кортазель Нижней Новгород ёнкссо Болдинань буесэ Пикшня велесэ эрзянь покшчистэ 2005 иень умарьковсто.

Ялгат! Эрзянь ломанть! Пикшнянь ды лия веленьгак! Мон эрзянь поэт. Чачинь Пикшнясо, ули мелем седейшкава кортамс мартонк, пшкадемс тенк ды ёвтамс оймесэм эриця валон эрзянь кельденть. Несынк зяро ломанть пурнавсть течи Пикшняс Эрзянь Покшчинть ютавтомо. Те эрзянь кенярксчи. Те корты вейкеде: ламо эрзят бажить кадовомс эрзякс, а стувтомс чачома келест. Теке марто эряви меремс: ламот кадызь эсь келест, эзть тонадо паро ладсо кортамо рузокскак. Сынь а эрзят, а рузт, а чарькодитькак, кодамо зыян кандыть эстест ды масторонтень. Эсь пряст «шождалгавтыть» эрзянь келень сюпавчинть ды эрзянь кельвалонть ёмавтомасонть.

Эрьва келесь максови ломанентень аванзо потеловцо марто ды сонзэ а полавтсы кодамояк лия кель. Те келенть марто ломанентень максови оймеськак. Эрзянь келенть марто максови эрзянь ойме. Кодамояк лия кель тиринь келекс тензэ а велявты. Минек келентень совась эрзянь раськень весе оймесь, сонзэ мазычизэ ды мик историязояк, совасть васень валонок: авай, тетяй, аванок чевте валост: левкскем, чивалдынем, сяткинем...

Покш кеняркс кандыть эрзянь моротне. Сынь, лиякс ёвтазь, максыть ормаменькс. Лайшематне кандыть ризнэма ды авардема, но сынь истя жо ваньскавтыть ойменть.

Эрзянь кельсэ ёвтазь ламо велень, паксянь ды вирень лемть. Сайсынек, невтемань кис, Пикшнянть. Сонсь велесь лиссь «пекше» валстонть. Ламо иеть ды мик пингеть сон кандтнесь Пекшень лем. Маласонзо рузонь велетне кармасть мереме тензэ Пикшень. Зярыя шкань ютазь Пикшнянь эрзятнеяк пурдасть рузтнэнь ёнов, кармасть мереме тензэ Пикшня. Минек паксянь ды виртннь ламо таркатне лемдязь эрзянь кельсэ. Та-кода умок чудесь тия лей, ней лиядсь эйстэнзэ чудикерькс. Те леенть чирева кастнесть селейть. Секс истя лемдякшнызьгак—Селелей. Покш вирень вейке тарканть лемезэ «Орёлонь пизэ». Зярдо-бути, умок лиснесть нуеме семиянек, вишка эйкакшосткак сайнилизь. Мадстнилизь сынст пулт лангс. Редизе тень орёл ды салызе эйкакшонть. Кандызе тумо пряс. Нуицятненень орёлось эзь кардаво. Зярыя иень ютазь ульнесь пирязь те тумось ды прястонзо орелонь пизэстэнть муезельть эйкакшонь ловажатне. Седе мейле кармасть мереме вирентень Орёлонь пизэ.

Кортадо эрзякс общественной таркатнесэ—автобуссо, троллейбуссо, лавкасо-косо, школасо, эсенк кудосо, нинк, мирденк ды эйкакшонк марто.

Чачома келензэ содазь эйкакшось карми седе шождасто тонадомо рузонь ды лия раськень кельтнес. Эрзянь келесь пек малавикс финнэнь, карелэнь, эстэнь, вегрань ды лия финнэнь-угрань кельтненень. Кие содасы эрзянь келенть, тензэ седе шожда тонадомс неть кельтнесэ кортамо, сермадомо. Ламо келень содыцятне парсте, васняяк, содылизь эсест келест.

Монень эрзянь келесь ульнесь эрямонь уцяскакас. Сонзэ мазычинзэ ды эсь чачонзо содазь, карминь содамо рузонь келенть. Армиясо служамсто мон нолдтнинь «боевой листокт», стенгазетат, сёрмадынь стихть.

Морседе эрзянь мороткак. Сынь максыть аволь ансяк оймень сюпавчи—мазычияк, шумбрачияк. Эрзянь келенть содазь, теевинь редакциянь важодицякс—редакторокс, поэтэкс ды войнань шкасто офицерэкс.

Эряви арсемс тедеяк: а улить эрзякс кортыцят, а ули, ёми эрзянь раськеськак. Те ули ёмавксокс Россиянтень. Сон тееви оймень коряс седе румозекс. Эрзянь келесь Россиянтькак сюпавчизэ.

Кортадо эрзякс! Вечкеде эсь келенк ды эсь раськенк!

*********************************************

Пикшня велем

Авакай, корьмакай,

Монь Пикшня велем.

Кода монень паро:

Аштят икелем.

Тон минек чачтымизь—

Невтик маней чинть

Ды панжик эрямонь

Келей валдо кинть.

Мороюткось:

Эряк тон ламо пингеть,

Монь эрзянь вел ем.

Ды кадык лембе кедьсэть

Улезэ кедем.

Эрямонь кинть лангсо

Кастыть парт ломанть.

Ульнесть толсо-ведьсэ,

Но сынь эзть ёма.

Андыцянь-симдицянь

Шнамо лем кандат.

Масторсонть ломантнень

Тон кшиде андат.

Мороюткось:

Умонь шкасто Пушкин

Инжекс теть сакшнось.

Сон паро арсемат

Тонеть ёвтакшнось.

Ней пурьгинечиркесь

Циторды велькссэть,

Прок Изнямонь арка

Ашти менельсэть.

Мороюткось:

Эряк тон ламо пингеть,

Монь Эрзянь велем.

Кадык лембе кедьсэть

Свал эжни кедем.

Павел Любаев, Мордовиянь заслуженной поэт



Ацамковонь 14-це чистэ Мария Романовна Биушкинань чачома чизэ!

Косо гайгевить эрзянь моротне. М.Биушкина

Я ВАМ ПИСАЛ…

ПОДПИСКА-2006 или праздники вместо работы

ПАТРИАРХ НИКОН. Его роль в русификации Эрзя и Мокша народов

Россия вновь давит на Эстонию в вопросе о нацменьшинствах

Язычники Эстонии возродили священный рунический календарь

Болтовня о двуязычной Эстонии—чушь

ОН НЕ ДУМАЛ О СЕБЕ... Штрихи к портрету Г.Я.Меркушкина

БИТВА, КОТОРОЙ НЕТ В УЧЕБНИКАХ.

КОРТАДО ЭРЗЯКС.

Эрзят, вешнеде эрзят!

Нурька морынеть

Из галереи славных эрзян

ЭРЗЯНЬ ЛОМАНЕНЬ БУЕЛЕМТЬ (ФАМИЛИЯТ). ЭРЮШ ВЕЖАЙ

«Ильведевксэнь витнема»



главная новости архив номеров ссылки гостевая книга