На главную страницу 
cделать стартовой   в избранное  



Культурно-просветительская газета татарской общины Республики Мордовия

Мордовия - Информационный портал Республики Мордовия - Морис.ру

Мелькужо Эрзянь Мастор - Форум Страна эрзян, эрзянский форум

Голос Эрзи


Раськень Озкс-2013. Ознотано Раськенек кис!

Медьковонь 13-це чистэ Покш Игнатбуень Чукалвелесэ ютась Раськень озкс. Меельцесь ульнесь 2010 иестэ. Анокстамотне мольсть колмо иень перть.

Васоло эрицятнень ютксто ламот сакшность шкадо икеле, кие лоткась гостиницас, кие жо ардсь сеске Чукалов, эрясть кужосонть кошосо. Истя, келя, седеяк парсте чарькодьсак Озксонть зэмензэ. Ломантнень талновтсь вейке: мекс арасель озксонть ютавтомадо кодамояк реклама? Лия ёнксонсетне кармасть содамо Интернет вельде. Эсенекетне – ялгань-оянь пельде. Телевизорось ды газетатне чатьмонсть. Содавольтькак, тей пурнавольть седеяк ламо эрзят.

Раськень Озксось – те эрзянь кезэрень кой. Сонзэ вельде Раськесь пшкади Инешкипазонтень, эрьвась канды мартонзо васонькоморо мода ды почодсы Маронть ланга. Историянь евтамотнень коряс, меельце Озксось Чукалсо ульнесь 1629 иестэ. Мейле сонзэ эзть мере ютавтнемс. Одс вельмевтезель 1999 иестэ. Мейле кардазель. Истя, Озкс ульнесь 2004, 2007, 2010 иетнестэ. 2004 иестэ МР-нь Прявтонть Кармавтоманзо коряс Раськень Озксонть кармась Мастор лангонь статусозо.

Озксонть ушодовомсто сыцятненень пшкадсь Инязорось Кшуманцянь Пиргуж (Г.Д.Мусалев). Сон мерсь, зярдо ушодови Инешкипазонтень пшкадемась, аштема сэтьмечисэ, а кортамс. Энялдсь евтамс Озксатянь ды Озксавать валтнэнь мельгаст, видестэ кепедемс кедтнень. Гайгезевсь Тюштянь торамось. Сон терди эрзятнень вейсэндявомс.

Те шкане сыть ды кузить Маронтнь лангс Озксава ды лездыцянзо. Сынь кандсть мартост кши, медь ды штатол. Озксавась яволявты атянть лемензэ, кие кирвазтьсы Раськень Штатолонть. Маронтень колмо ендо кузить атят. Тедеде Штатолонть кирвазтизе 2012-це иень А.П.Рябовонь лемсэ лауреатось, чувтосто керсицясь Калаганонь Керяз (П.В.Рябов). Те штатолось – раськень вейсэндямонь тешкс, парос кемема. Сталмозо – малав 800 килот, серезэ – ниле метрат. Штанть лездасть пурнамс Россиянь келес ламо ломанть.

Штатолось кирвазтевсь. Озксатясь пшкади Инешкипазонтень. Неть валтнэнь эрзятне арсизь- аравтнизь зярыя пингеде икеле. Сынст кунсолозь, токави седееть, а кадоват мельтеме. Зяро эйсэст вий, видечи, кемема, смусть!

Инешкипаз, Вере Чипаз!

Тон, марицясь, кода тикше касы,

Тон, неицясь, кода пеште панжи,

Неемизь, марямизь!

Сюконятано пильгезэть,

Пшкадтяно валдо оймезэть,

Верев кепедьсынек кеденек,

Масторов нолдасынек сюкпрянок.

Ознотано эрицянок кис,

Ознотано раськенек кис,

Энялдтано эйденек кис,

Паксясо видезенть кис,

Кардазсо ракшанок кис.

Инешкипаз! Макст тенек

Сэтьме, лембе пиземеть,

Валдо, маней чить,

Чачост-касост сюронок,

Касост-кепедевест тяканок,

Раштыцят улест аванок.

Макст Масторонтень ладямо,

Вейке-вейкень вечкема.

Лисьмакс парот лисезэ,

Леекс эрьметь чудезэ,

Кенкшпряваяк совазо,

Кенкшалгаяк ютазо.

Минь Тонеть - Шумбра кши!

Тон миненек - шумбрачи!

Паз, чангодть! Паз, чангодть!

Паз, чангодть!

Марямс, кунсоломс неть валтнэнь —чансть! Сындест мейле Озксавась энялды кундамс лемест сетнень, кить арасть ютксонок, минек покштятнень-бабатнень. Ёвты истят ознома валт.

Эрзянь покшт, покштинеть,

Покштянь покшавинеть!

Сырк мерезэ, покштинеть,

Матразь-оймазь киськиненк,

Кепсть мерезэ, бабинеть,

Раужо човаля модыненк.

Вана тердтядызь Озксов

Кши-салонок варчамо,

Пурень-брагань корштамо.

Ашо кедьсэ панинек,

Шожда мельсэ пидинек.

Садо ваксозонок,

Човоряводо юткозонок,

Начтынк коське турвиненк,

Пештинк вачонь пекиненк,

Таньшкавтынк сэпей кургиненк.

Кинь лемезэ кундави,

Кинь лемезэ стувтови,

Илядо кежиявто,

Илядо ордашкале.

Весе тынь - седейсэнек,

Весе тынь - минек верьсэ.

Минь тынк эйстэ лисинек,

Минь тыненк велявттано.

Садо, весе садо!

Илязт уле ве ёндо ваныцят,

Илязт уле сельмень сявадыцят.

Пачкодезэ, молезэ!

Паз, чангодть! Паз, чангодть! Паз, чангодть!

Теде мейле Озксаванть тердеманзо коряс Маронтень лисить эрзянь ине ломантне, конат Тоначисэ. Сынст невтить театрань актертнэ. Маронть тёкшос кузить Тюштя, ушмодеесь Пургаз, ушмодеесь Баюш Разгильдяев, кона 1612-це иестэ изнинзе ногайтнень, Разинэнь С. шкасто ушманонь ветицятне Эрзямасонь Олена ды Боляень Акай, седе мейле Василень Несмеян, Алексеень Кузьма, Чапаень Василь, Евсевьев М.Е., Рябов А.П., Эрьзя С.Д., Люлякина С.М., Надькин Д.Т., Йовлань Оло… Весе сынь евтасть превс путома валт. Саемга, содавикс ученоесь Евсевьев М.Е. мерсь: «Эрзянь келесь мазый. Карминдерятано эрзятненень ды мокшотненень сёрмадомо ды печатамо човорязь «мокшэрзянь» кельсэ, кияк кортамо-ловномо а карми. Кода сёрмадтадо, истя сёрмадодо седе товгак: эрзятне – эрзякс, мокшотне – мокшокс. Казема мельганок сыцятненень культура, сеть мазычитнень, конатнень таштасть покштянок аволь ве пингень перть. Весемеде пек мелявтан эрзянь келенть кувалма».

Седе тов Маронть перька юты сокас кильдезь лишме, теить кикс. Истя жо састыне ютыть атятне. Сынь колмоксть сюконить Маронтень, пульзить, мейле паласызь моданть.

Коень коряс, эрьвантень эрявсь самс тей мода марто (саемс сонзэ эсеть эрямо таркасто) ды почодомс Маронть ланга. Васня моданть почодыть лия енкссто сазь инжетне, мельгаст лиятне. Мейле весе кундыть кедте кедьс ды теить ояксчинь покш кирькс. Гайгезеви «Вирев молян» морось. Сонзэ морамо кундыть кирьксс лисицятне. Кирьксэсь те шкане яла келейгады ды келейгады, мейле панжови омбоце кирькс. Весе вейсэ вастовить кужонть куншкасо, евтыть вейкест-вейкест туртов лембе валт ды пижнить «эрзя», «эрзя»!

Раськень Озксонть пингстэ пурназель Атянь Эзем. Эйсэнзэ ульнесть минек республикань ды томбалень эрзятне. Ульнесть пшти кортамот эрзянь раськенть аволь шумбра ёжодонзо. Тесэ кочкавсь Инязор. Салавань кочкамотнень коряс Инязорокс кармась Кшуманцянь Пиргуж (Мусалев Г.Д.). Кисэнзэ кепедизь кедест весе сыцятне. Сон евтась сюкпрянь валт ды алтась седе товгак ветямс эрзянь келень, культурань ванстома тевтнень.

Васень чирязокс аравтызе Мурман ёнксонь эрзянть Эрюшень Вежаень, омбоце чирязокс - Мордовия Республикань Нуянь Видязонь.

Уш зяроце ие «Руця» фондось ютавты эрзянь авань сехте мазый оршамопелень конкурс. Фондонь прявтось – Мурманск енксонь эрзянь церась Эрюш Вежай (Борис Ерюшов). Сон, Ковалева Т.М. ды Жегалина Р.Д. аштить жюрисэ, кунсолыть аватнень, конат евтнить эсь палядост, кода стызь- викшнизь, зяро шка ютавтсть. Мерема, те пелькстамонтень иеде иес явить мель ламо ломанть. Тедеде васенце таркась максозь Родионова Надежданень (Саран), омбоцесь – Володина Надежданень (Орданьбуе), колмоцесь –Зорькина Раисанень (Саран).

Важодсть декоративно-прикладной шкинемань, ярсамопелень выставкат. Инжетнень каванясть ямсо, прякасо, пачалксесэ, каймаксо. Симдсть позадо. Микшневсть эрзянь книгат, валкст, сувенирт, моро марто дискт. Пенза енксонь инжетне усксесть миемс «эрзя» тешкс марто кизэнь панарт ды лия эрьва кодат сувенирт.

Ламо од ломанть пурнавкшность «Тюштянь налксемат» кужинесэнть. Кужодонть ве ено аштесть 26 саргот. Сынст эйсэ пидевсь букань тантейдеяк тантей лемень кундамонь ямось.

Монень ульнесь пек мельспаро - вастынь ялган! Весень: конатнень умок эзинь нее, конатнень содылинь ансяк интернет вельде....Вай, зяро вийть пурнынь тосто! Сынь сатыть колмо иес, сы озксос. Ней вастовтано 2016-це иестэ!

Толава

Сценарий Озкса полностью дан в «ЭМ» № 10/402.

**************************

Аштемковонь (сентябрянь) 24-це чистэ «Эрзянь Масторонтень" топодить 20!

***********************



Раськень Озкс-2013. Ознотано Раськенек кис!

Поздравление Кшуманцянь Пиргужу (Г.Д. Мусалёва) в связи с его выборами Инязором Эрзя народа

МОРДВА, ТАТАРВА, БРАТВА…

ВРАГИ НАРОДА

РЕЗОЛЮЦИЯ IV-го Конгресса Эрзя народа (Эрзянь Инекужо),

ОБРАЩЕНИЕ Атянь Эзем – Совета Старейшин Раськень Озкса - 2013

Пётр, ты не прав!

А.Шаронов. Стих

Праздник со слезами на глазах

По дорогам Мерянии

Человек беспокойной души

Первый мерянский съезд прошел в Плёсе

В Татарстане прошёл эрзянский праздник Балтай

В Баку демонтировали памятник рабочему, созданный в начале XX в. эрзянским скульптором Степаном Эрьзей



Узось чуди. Зярс... Мацьказ Лёфай

Есть только миг между прошлым и будущим.....Галина Жданкина

Счастье. Валерий Салтанов

«Дорамось терди». «Зов торамы»



главная новости архив номеров ссылки гостевая книга